തിരുവനന്തപുരം: മഴക്കാലത്ത് റോഡുകളില് വാഹനാപകടങ്ങള് വർധിക്കാനുള്ള സാധ്യത കണക്കിലെടുത്ത് സുരക്ഷാ നിർദ്ദേശങ്ങളുമായി കേരള പോലീസ്.
വാഹനം തെന്നിമാറാനും കൂട്ടിയിടിക്കാനുമുള്ള സാധ്യത കൂടുതലായതിനാല്, ശ്രദ്ധയോടെയുള്ള ഡ്രൈവിംഗ് ശീലങ്ങള് പാലിക്കണമെന്ന് പോലീസ് ഫേസ്ബുക്ക് പോസ്റ്റിലൂടെ പങ്കുവെച്ചു.
1. വേഗം പരമാവധി കുറയ്ക്കുക
റോഡില് വാഹനങ്ങള് പുറന്തള്ളുന്ന എണ്ണത്തുള്ളികള് മഴ പെയ്യുന്നതോടെ അപകടക്കെണികളായി മാറും. മഴവെള്ളത്തിനൊപ്പം എണ്ണയും ചേരുമ്ബോള് റോഡ് വഴുക്കലുള്ളതാകും. പരമാവധി പതുക്കെ വാഹനം ഓടിക്കുകയാണ് ഉചിതം. സ്റ്റിയറിംഗ് വെട്ടിത്തിരിക്കുന്നതും പെട്ടെന്ന് ബ്രേക്ക് ചവിട്ടുന്നതും ഒഴിവാക്കുക. ആക്സിലറേറ്ററില് നിന്ന് കാലെടുത്ത് വേഗം നിയന്ത്രിക്കുന്നതാണ് സുരക്ഷിതം.
2. ഹെഡ് ലൈറ്റ് ലോ ബീമില് ഓണാക്കുക
ശക്തമായ മഴയത്ത് ഹെഡ്ലൈറ്റുകള് ലോ ബീമില് കത്തിക്കുന്നത് നിർബന്ധമാണ്. റോഡ് വ്യക്തമായി കാണുന്നതിനും, മറ്റു വാഹനങ്ങളുടെ ഡ്രൈവർമാരുടെ ശ്രദ്ധയില് നിങ്ങളുടെ വാഹനം പെടുന്നതിനും ഹെഡ്ലൈറ്റ് സഹായിക്കും. വാഹനത്തില് ഫോഗ് ലൈറ്റ് ഉണ്ടെങ്കില് അത് ഉപയോഗിക്കുക.
3. ടയറുകള് ശ്രദ്ധിക്കുക
മഴക്കാലത്തിനു മുമ്ബ് ടയറിൻ്റെ നിലവാരം പരിശോധിക്കുന്നത് അത്യാവശ്യമാണ്. തേയ്മാനം കൂടിയ ടയറുകള്ക്ക് ഗ്രിപ്പ് കുറവായിരിക്കും. തേഞ്ഞ ടയറുകള് ഒഴിവാക്കുക. അലൈൻമെൻ്റും വീല് ബാലൻസിങ്ങും കൃത്യമാക്കുകയും ടയറിലെ വായുമർദ്ദം നിശ്ചിത അളവില് നിലനിർത്തുകയും വേണം.
4. മുൻകരുതല് ഉറപ്പാക്കുക
യാത്ര തുടങ്ങുന്നതിന് മുമ്ബ് വാഹനത്തിൻ്റെ സുരക്ഷാ സംവിധാനങ്ങള് ശരിയായി പ്രവർത്തിക്കുന്നുണ്ടോയെന്ന് പരിശോധിക്കണം. ഹെഡ്ലൈറ്റ്, ബ്രേക്ക് ലൈറ്റ്, ഇൻഡിക്കേറ്റർ, വൈപ്പർ, ഹാൻഡ് ബ്രേക്ക് തുടങ്ങിയവയുടെ പ്രവർത്തനം ഉറപ്പാക്കുക.
5. വലിയ വാഹനങ്ങളോട് അകലം പാലിക്കുക
വലിയ വാഹനങ്ങളുടെ തൊട്ടുപിന്നാലെ യാത്ര ചെയ്യുന്നത് ഒഴിവാക്കുക. കൂറ്റൻ ടയറുകള് തെറിപ്പിക്കുന്ന ചെളിവെള്ളം കാഴ്ച തടസ്സപ്പെടുത്തും. ബ്രേക്ക് കിട്ടാതെ അപകടം ഉണ്ടാകാനുള്ള സാധ്യതയുണ്ട്. വാഹനം പൂർണ്ണ നിയന്ത്രണത്തിലാക്കാൻ മറ്റു വാഹനങ്ങളുമായി പരമാവധി അകലം പാലിക്കുക.
6. ശക്തമായ മഴക്കാലത്ത് യാത്ര ഒഴിവാക്കുക
മഴ അതിശക്തമാണെങ്കില്, വാഹനം റോഡരികില് സുരക്ഷിതമായി നിർത്തിയിട്ട് മഴയുടെ ശക്തി കുറഞ്ഞ ശേഷം യാത്ര തുടരുക.
إرسال تعليق