തിരുവനന്തപുരം: മൈസൂർ വ്യാജ ലൈസൻസ് തട്ടിപ്പ് കേസില് തിരൂരങ്ങാടിയിലെ ആർടിഒ ഓഫീസിലെ ഉദ്യോഗസ്ഥർക്ക് സസ്പെൻഷൻ.
എംവിഐ ജോർജിനും ക്ലർക്ക് നജീബിനുമാണ് സസ്പെൻഷൻ. ഉദ്യോഗസ്ഥർക്കെതിരെ വിജിലൻസ് അന്വേഷണത്തിനും ശുപാർശ ചെയ്തു. സംസ്ഥാനത്ത് വൻ ഡ്രൈവിംഗ് ലൈസൻസ് തട്ടിപ്പ് നടക്കുന്നുവെന്നാണ് പുറത്തുവരുന്ന റിപ്പോർട്ടുകള്.
ഡ്രൈവിംഗ് ടെസ്റ്റ് നടത്താതെ ഏജൻറുമാർ മുഖേന മൈസൂരില് നിന്നും ലൈസൻസ് തരപ്പെടുത്തുന്ന സംഘം വടക്കൻ കേരളത്തില് സജീവമാണെന്നാണ് റിപ്പോർട്ട്.
മൈസൂരില് നിന്നും സംഘടിപ്പിക്കുന്ന ലൈസൻസില് മേല്വിലാസവും ഒപ്പും ഫോട്ടോയും മാറ്റി കേരളത്തിലെ ലൈസൻസ് ആക്കി മാറ്റാൻ മോട്ടോർ വാഹന വകുപ്പിലെ ഉദ്യോഗസ്ഥർ കൂട്ടുനില്ക്കുന്നുവെന്നാണ് വിവരം. തട്ടിപ്പില് മോട്ടോർ വാഹന വകുപ്പിൻെറ വിജിലൻസ് വിഭാഗം അന്വേഷണം തുടങ്ങിയതായി ഗതാഗതകമ്മീഷണർ അറിയിച്ചു.
ഡ്രൈവർ ടെസ്റ്റ് മാനദണ്ഡങ്ങള് കർശനമാക്കിയതോടെ നിലവില് തമിഴ്നാട്ടിലേക്കും കർണാകടയിലേക്കും ഏജൻറുമാർ മുഖേന ലൈസൻസ് തരപ്പെടുത്തുന്നവരുടെ ഒഴുക്കാണിപ്പോള്. എന്നാല് ഡ്രൈവിംഗ് ടെസ്റ്റില് പങ്കെടുക്കാതെ, കർണാടകയില് പോകാതെ ലൈസൻസ് തരപ്പെടുത്തുന്ന മാഫിയ സംസ്ഥാനത്ത് സജിവമാവുകയാണ്.
മലപ്പുറം സ്വദേശി മുഹമ്മദ് ബഷീറെന്നയാള്ക്ക് മൈസൂരു വെസ്റ്റ് ആർടിഒ നല്കിയ ഡ്രൈവിംഗ് ലൈസൻസിലെ ക്രമക്കേട് ഇതിന് ഉദാഹരണമാണ്. കഴിഞ്ഞ വർഷം ഡിസംബർ 20നാണ് മൈസൂരിലുള്ള വിലാസത്തില് ലൈസൻസ് കിട്ടിയത്.
1970ല് ജനിച്ചുവെന്ന രേഖകളിലുള്ള മുഹമ്മദ് ബഷീറിൻ്റെ ഡൈവിംഗ് ലൈസൻസിലുള്ളത് ഒരു യുവാവിൻെറ ചിത്രം മാത്രമാണ്. ഇതേ മുഹമ്മദ് ബഷീർ വിലാസവും ഒപ്പും മാറ്റാനായി തിരൂരങ്ങാടി സബ് ആർടിഒ ഓഫീസില് ദിവസങ്ങള്ക്കകം അപേക്ഷ നല്കുന്നു. ഡിസംബർ 28ന് തിരൂരങ്ങാടിയില് നിന്നും മലപ്പുറത്തെ വിലാസത്തില് പുതിയ ചിത്രവും ഒപ്പമുള്ള പുതിയ ഡ്രൈവിംഗ് ലൈസൻസ് നല്കുന്നു. ഇതേ മുഹമ്മദ് ബഷീർ ലൈസൻസിനായി സമർപ്പിച്ച ആധാറുകളാണിത്.
രണ്ട് പേരുടെ ചിത്രങ്ങള് പതിച്ച മൈസൂരിലും മലപ്പുറത്തും വിലാസമുള്ള ആധാറുകള് കണ്ടെത്തി. സമാനമായ നിരവധി തട്ടിപ്പുകളാണ് സംസ്ഥാനത്ത് നടക്കുന്നത്. മൈസൂർ വിലാസത്തില് മറ്റൊരു ചിത്രം വച്ച് ഡ്രൈവിംഗ് ലൈസൻസ് നല്കുന്നു. തിരൂരങ്ങാടിയില് വിലാസം മാറ്റാനുള്ള അപേക്ഷയുടെ മറവില് ഫോട്ടോയും വിലാസവും ഒപ്പും എല്ലാം മാറ്റി കേരളത്തിലെ വിലാസത്തില് പുതിയ ലൈസൻസ് നല്കും.
കേരളത്തിലും മൈസൂരിലുമുള്ള ഉദ്യോഗസ്ഥരും ഇടനിലക്കാരും ചേർന്നുള്ള വൻ തട്ടിപ്പാണിതെന്നാണ് കണ്ടെത്തല്. ഡ്രൈവിംഗ് ടെസ്റ്റിന് പങ്കെടുക്കാത്ത ഒരാളുടെ പേരില് എങ്ങനെ മൈസൂരില് ലൈസൻസ് നല്കും. രണ്ട് ചിത്രങ്ങള് കണ്മുന്നിലുള്ളപ്പോള് തിരൂരങ്ങാടിയിലെ എംവിഡി ഉദ്യോഗസ്ഥർ എങ്ങനെ പുതിയ ലൈസൻസ് നല്കും. ഇതാണ് ഉയർന്ന പ്രധാന ചോദ്യങ്ങള്. തട്ടിപ്പുകള് ശ്രദ്ധയില്പ്പെട്ടിട്ടുണ്ടെന്നും ആഭ്യന്തര വിജിലൻസ് അന്വേഷണം തുടങ്ങിയെന്നും ഗതാഗത കമ്മീഷണർ വിഎച്ച് നാഗരാജു പറഞ്ഞു.
Post a Comment